2026 жылы 23 наурыз бен 21 сәуір аралығында ТОО НПП «Антиген» ғылыми қызметкері, PhD докторант Нурмухамбетова А. Индонезиядағы Бандунг технологиялық институтының Фармация мектебінде (Sekolah Farmasi, Institut Teknologi Bandung, ITB, Индонезия) ғылыми тағылымдамадан өтті.
Диссертациялық зерттеу аясында антирабикалық иммуноглобулинді алудың негізгі кезеңдері зерттелді, оның ішінде иммундық плазманы дайындау, иммуноглобулин фракциясын бөліп алу және тазарту, сондай-ақ дайын субстанцияның сапасын бақылау қарастырылды. Антирабикалық иммуноглобулиннің құтыру ауруының шұғыл профилактикасына арналған иммунобиологиялық препарат ретіндегі қауіпсіздігін, спецификалық белсенділігін, стерильдігін, тазалығын және фармакологиялық тиімділігін бағалауға ерекше назар аударылды.
Зерттеу барысында антирабикалық иммуноглобулиннің субстанциясын және дайын препаратын алу кезеңдерінде сапаны бақылау әдістері зерттелді. Мөлдірлігі, ақуыз мөлшері, иммуноглобулин фракциясының тазалығы, стерильдік, апирогендік, қауіпсіздік, спецификалық белсенділік және тұрақтылық көрсеткіштері қарастырылды. Алынған деректер антирабикалық иммуноглобулинді стандарттау талаптарын негіздеуге және оның фармакологиялық тиімділігін бағалауға мүмкіндік береді.
Алынған нәтижелер антирабикалық иммуноглобулинді алу, тазарту, стандарттау және сапасын бақылау бойынша отандық технологияларды жетілдірудің ғылыми негізін қалыптастырады.
Тағылымдаманың негізгі бағыттары:
- 1. Құтыру вирусына қарсы антирабикалық антиденелердің спецификалық белсенділігін бағалау және иммундық жауап деңгейін анықтау үшін ИФА әдісін меңгеру.
- 2. Антирабикалық иммуноглобулиннің ақуыздық құрамын талдау, оның тазалығын, молекулалық профилін және негізгі ақуыз фракцияларының болуын бағалау мақсатында электрофорез жүргізу.
- 3. Антирабикалық иммуноглобулин үлгілеріндегі жалпы ақуыз мөлшерін алу және тазарту кезеңдерінде сандық анықтау үшін Брэдфорд әдісін қолдану.
- 4. Антирабикалық иммуноглобулиннің сапасын, тұрақтылығын және стандартталуын сипаттау үшін ИФА, электрофорез және Брэдфорд әдістерінің нәтижелеріне салыстырмалы баға беру.
- 5. Антирабикалық иммуноглобулиннің сапасын бақылау және фармакологиялық тиімділігін бағалаудың оңтайлы тәсілдерін негіздеу мақсатында алынған эксперименттік деректерді талдау.